Azərbaycan millisinin baş məşqçisi: "Litva və Monteneqronu üstələyəcəyimizə inanıram"
https://mail.qalaba.az//uploads/photo/azerbaycan-millisinin-bash-meshqchisi-litva-ve-monteneqronu-usteleyeceyimize-inaniram.webp
İnanıram ki, əldə etdiyimiz bilgilər sayəsində rəqibləri üstələyə biləcəyik.
Bunu "QELEBE.AZ"a açıqlamasında Azərbaycanın qadın futbolçulardan ibarət millisinin baş məşqçisi Siyasət Əsgərov deyib.
O, hazırda Litvanın paytaxtı Vilnüsdə təlim-məşq toplanışı keçən yığmanın durumu barədə danışıb:
"Heyətdə yer alan futbolçuların əksəriyyəti ölkə xaricində çıxış etdiyi üçün məshələt oldu ki, Litvada bir araya gələk. İlk gündə bir, daha sonra isə gündə iki dəfə olmaqla məşqləri davam etdiririk. Toplanışa cəlb olunan oyunçular özlərini yaxşı tərəfdən göstərirlər. Hətta bəzi futbolçular var ki, çıxış etdikləri klubların son görüşlərində meydana çıxmayıblar. Bununla belə, onların da fiziki hazırlığını qənaətbəxş hesab etmək olar".
Mütəxəssis heyətdə yer vermək istədiyi bəzi futbolçulara zədə səbəbindən dəvət göndərə bilmədiyini söyləyib:
"Kristina Bakarandze, Vüsalə Seyfəddinova və Milana Rəhimovanı təlim-məşq toplanışına cəlb edə bilmədik. Halbuki, planımızda onlar da var idi. Sadəcə, çıxış etdikləri klublarda zədələndikləri üçün çağıra bilmədik".
S.Əsgərov UEFA Millətlər Liqasının seçmə mərhələsində Litva və Monteneqro yığmalarına qarşı keçiriləcək səfər oyunlarında maksimum nəticə qazanmaq istədiklərini bildirib:
"Səfərə maksimum xal qazanmaq üçün gəlmişik. Monteneqro ilk görüşündə Litvaya qalib gəlib. Biz isə birincilərlə heç-heçə etmişik. Bu iki görüşdə qazanacağımız nəticələr qrupda tutacağımız yeri müəyyənləşdirə bilər. İlk olaraq Litvaya qalib gəlmək üçün əlimizdən gələni edəcəyik. Ardınca Monteneqro ilə matça köklənəcəyik. Hər iki yığmanın oyun üslubunu təhlil etmişik. İnanıram ki, əldə etdiyimiz bilgilərlə rəqibləri üstələyə biləcəyik. Meydanda minimum səhvə yol versək, istədiyimiz nəticəni qazana bilərik".
Qeyd edək ki, milli UEFA Millətlər Liqasının C Liqasının IV qrupunda aprelin 4-də, Bakı vaxtı ilə saat 19:30-da Vilnüsdəki “Jalgiris” stadionunda Litva, aprelin 8-də, Bakı vaxtı ilə saat 20:00-da Nikşiç şəhər stadionunda Monteneqro ilə qarşılaşacaq.
